Polisie trek 9 mans vas oor perlemoen van R2 miljoen
2011-09-23 00:00
- Artikelopsies
- Deel
- Kry Die Burger op
Kaapstad
Die polisie het gister die soveelste slag teen stropers geslaan toe hulle in Milnerton op R2miljoen se perlemoen beslag gelê het.
Nege mans is omstreeks 09:00 by ’n sakeperseel in Killarney Gardens in hegtenis geneem nadat die polisie op ’n wenk gereageer het.
Twee beamptes van die Milnerton-polisie het op die gebou toegeslaan en op 600 bokse perlemoen beslag gelê. Die bokse bevat elkeen 10kg perlemoen, het lt.kol. André Traut, provinsiale polisiewoordvoerder, gister gesê.
Niemand het glo probeer vlug nie en die misdaadtoneel is later aan die eenheid teen georganiseerde misdaad oorgegee.
“Die mans het glo die bokse agterop ’n vragmotor gelaai wat dit na die Kaapstad-hawe sou bring.”
Die mans, tussen die ouderdomme van 21 en 39, sal Maandag op aanklag van die onwettige besit van perlemoen in die Kaapstad-landdroshof verskyn.
Vroeër vandeesmaand is perlemoen ter waarde van R250000 in ’n Audi op die dorp Sir Lowry’s Pass gevind.
’n Vermeende perlemoensmokkelaar (45) is ná ’n jaagtog tussen die polisie se blitspatrollie, hul K9-honde-eenheid en ’n verdagte groen Audi op die N2 in die rigting van Somerset-Wes in hegtenis geneem. Altesaam 16 sakke met 1644 perlemoene is in die Audi gevind.
In Augustus het die polisie perlemoen van R2miljoen in ’n luukse Porsche Cayenne Turbo gevind wat ná ’n jaagtog op die dorp Sir Lowry’s Pass gekry is.
Die polisie het ’n week tevore op perlemoen van R1,8miljoen in ’n BMWX5 op Grabouw beslag gelê.
- Die Burger