Strydom, Uys en twee kore van SA gaan na Nederland
2011-09-23 00:00
- Artikelopsies
- Deel
- Kry Die Burger op
Kaapstad
Onder die vier Suid-Afrikaanse produksies wat binnekort na Nederland reis, is dié van Amanda Strydom en haar groep.
Hulle is in Nederland van 29 November tot 17 Desember vir optredes van haar produksie Vuur in Glas in verskeie stede. Dié produksie keer terug na Nederland ná ’n onlangse suksesvolle speelvak en vanweë die groot vraag na haar werk daar.
Strydom was vroeër vanjaar op die eerste Afrikaans-fees in die Tropenteater in Amsterdam.
Die satirikus Pieter-Dirk Uys sal sy nuwe komedie Desperate First Ladies wat tans in die Baxter in Rondebosch te sien is, ook in Nederland opvoer. Van 1 tot 21 November sal dit in verskeie stede vir altesame 12 optredes te sien wees.
Twee Suid-Afrikaanse kore gaan ook na Nederland en hul program is ook bekend gemaak.
Die Khayelitsha United Mambazo Choir se toer Celebrating South Africa sal van 7 Januarie tot 4 Maart volgende jaar wees, en hulle tree in 38 lokale in verskeie stede op.
Die 26 sangers van die Soweto Gospel Choir sal in November in Nederland reis met 17 konserte vir hul toer genaamd Heaven Sent.
Die produksies geskied onder die vaandel van die Nederlandse Bos-teaterproduksies. Hulle is verant- woordelik vir teaterwerke soos Amadeus met Jeroen Krabbé en Marc-Marie Huijbregts, die musiekspel Amandla! Mandela! en De Aanslag na die boek van die skrywer Harry Mulisch.
Besoek www.bostheaterproducties.nl.
- Die Burger