Tâl ac Absenoldeb Mamolaeth Statudol: arweiniad i gyflogwyr
Hawl
Mae’r canllaw hwn hefyd ar gael yn Saesneg (English).
Absenoldeb Mamolaeth Statudol
Gall cyflogeion cymwys gymryd hyd at 52 wythnos o absenoldeb mamolaeth. Gelwir y 26 wythnos gyntaf yn ‘Absenoldeb Mamolaeth Cyffredin’, a’r 26 wythnos olaf fel ‘Absenoldeb Mamolaeth Ychwanegol’.
Y cynharaf y gellir cymryd absenoldeb yw 11 wythnos cyn yr wythnos y disgwylir i’r plentyn gael ei eni, oni bai bod y babi yn cael ei eni’n gynnar.
Mae’n rhaid i gyflogeion gymryd o leiaf 2 wythnos ar ôl yr enedigaeth (neu 4 wythnos os ydynt yn gweithio mewn ffatri).
Tâl Mamolaeth Statudol (SMP)
Gellir talu Tâl Mamolaeth Statudol ar gyfer cyflogeion cymwys am hyd at 39 wythnos, fel arfer fel a ganlyn:
- y 6 wythnos gyntaf: 90% o’u henillion wythnosol cyfartalog cyn treth
- y 33 wythnos sy’n weddill: £184.03 neu 90% o’u henillion wythnosol cyfartalog (pa un bynnag sydd isaf)
Mae angen didynnu treth ac Yswiriant Gwladol.
Defnyddiwch y gyfrifiannell Tâl Mamolaeth Statudol i gyfrifo absenoldeb a thâl mamolaeth cyflogai.
Mae gan rai mathau o gyflogaeth, megis gweithwyr asiantaeth, cyfarwyddwyr a gweithwyr addysgol, wahanol reolau o ran hawl.
Absenoldeb neu dâl ychwanegol
Gallwch gynnig mwy na’r symiau statudol os oes gennych gynllun mamolaeth cwmni. Mae’n rhaid i chi sicrhau bod eich polisïau absenoldeb a thâl mamolaeth yn eglur ac ar gael i staff.
Os yw’r babi yn cael ei eni’n gynnar
Mae absenoldeb yn dechrau’r diwrnod ar ôl yr enedigaeth, os yw’r babi’n cael ei eni’n gynnar.
Mae’n rhaid i’r cyflogai roi tystysgrif geni’r plentyn i chi neu ddogfen wedi’i llofnodi gan feddyg neu fydwraig sy’n cadarnhau’r union ddyddiad geni.
Mae’n rhaid i chi ysgrifennu at eich cyflogai er mwyn cadarnhau’r dyddiad newydd y bydd ei habsenoldeb yn dod i ben.
Ar gyfer genedigaethau cynamserol iawn pan fo’r plentyn yn cael ei eni 15 wythnos neu fwy cyn y dyddiad disgwyl, bydd angen i chi gyfrifo Tâl Mamolaeth Statudol gan ddefnyddio’ch meddalwedd gyflogres (os oes ganddi’r nodwedd hon) neu ei gyfrifo â llaw.
Os yw’r babi’n marw
Mae cyflogeion yn dal i fod yn gymwys i gael absenoldeb neu dâl os yw’r babi:
- yn farw-anedig ar ôl dechrau 24ain wythnos y beichiogrwydd
- yn marw ar ôl cael ei eni
Hawliau cyflogaeth
Diogelir hawliau cyflogaeth y cyflogai (fel yr hawl i gyflog, gwyliau a dychwelyd i swydd) yn ystod absenoldeb mamolaeth.
Mae’n dal yn rhaid i chi dalu Tâl Mamolaeth Statudol, hyd yn oed os ydych yn rhoi’r gorau i fasnachu.