佳士工潮

佳士工潮喺2018年7月爆發。深圳佳士科技有限公司職工爭取組織工會，點知俾公司解僱，又俾中共工會打壓，仲有工人及聲援者俾人打、俾差佬鎖。事件引起全國乃至世界關注。

背景

佳士科技喺2005年成立，專做焊割設備嘅研發、生產同銷售，後來喺深圳證券交易所上市，服務據講遍佈全球。公司喺深圳、重慶、成都等地設有工廠，其中深圳工廠僱用約1000人。據亞洲新聞通訊社報導，工人表示佳士科技位於深圳坪山嘅工廠工作條件惡劣，公司又削減同拖欠工資、社會保險同住房公積金，仲巧立名目定咗嚴苛嘅罰款。有時更表亦會未經諮詢就改，仲會要求工人超時加班。工人話呢間公司對佢哋「像奴隸一樣」。

喺中共治下，工會需要服從黨同政府，因此工會唔係企喺工人立場，而係幫雇主管制工人。自2015年開始，隨著政府放貸減少，勞工權利被大規模削減，導致工人對於勞動強度過大同工資水平過低覺得十分不滿。

據《中國勞工通訊》報導，2017年9月到2018年8月呢12個月，全中國發生超過1860次罷工或工人抗議活動。2015年至2017年，該組織總共收到工人集體行動個案6694單，其中5177單訴求係追討欠薪，303單要求加人工，呢兩類比例加埋超過80%。而且工人集體行動發展好快，由珠江三角洲、長江三角洲迅速向內陸擴展，亦組織得好咗。中國勞資矛盾非常嚴重，威脅到政權。紐約時報引述匿名專家觀點，指出隨著中國經濟進一步發展，未來幾年將會有500至600萬工人失業，可能會帶來更多動蕩。

經過

5月10號，佳士員工余浚聰俾人炒魷。佳士科技有限公司工人向坪山區總工會反映情況，區總工會表示可以組建工會解決問題。6月，深圳佳士科技管理層組建咗「職工代表大會」，實質上將要求組建工會嘅工人所提出嘅候選人排除在外。6月7號，員工向坪山區總工會同佢哋屬下嘅龍田街道總工會提交組建工會嘅申請，中共工會嘅意見係員工可以先去發展會員。6月29號，成班工人寫低《致佳士科技職工代表換屆選舉籌備組的一封信》。7月12號，喺區總工會指示下，籌建工會嘅員工廣泛傳播《申請加入佳士工會意願表》，有89位員工簽字。7月16號，組建工會嘅工人代表劉鵬華俾兩個生埗人毆打。7月18號，另一位工人代表米久平俾人掟出廠。

7月20號，廿幾個佳士工人同聲援者俾深圳坪山區燕子嶺派出所警員抓捕。7月21號，呢班工友發布嘅公開信顯示，帶頭嘅工友喺16號開始陸續俾人毆打或者開除；20號，佢哋嘗試正常返工，俾十幾個保安擡出場，其中一個工人俾人打到瞓喺度，廿幾個工人俾人捉咗。21號晏晝，佢哋獲釋。22號，佳士工人到燕子嶺派出所門口，要求建立工會，嚴懲打人嘅差佬，合唱《團結就是力量》示威。

聲援團

7月27號晏晝，30個前往燕子嶺派出所抗議嘅工人、聲援者，總共23男7女，再次俾警方拘捕，其中至少6人俾燕子嶺派出所以尋釁滋事罪刑事拘留。29號，各地前來聲援嘅學生、左派人士來到派出所。呢啲聲援者以後生為主，有啲坐喺地度，有啲圍埋一圈企喺度，高叫口號並齊唱《國際歌》。社交媒體上流傳嘅影片顯示，包括工人、學生等15名代表，由廣州工運人士沈夢雨率領，喺30號晏晝四點半向坪山區委書記遞交公開信。喺宣讀完公開信之後，聲援者試圖進入區政府，但俾人阻攔。約30分鐘後，警方又捉咗呢15人。有消息指佢哋喺當晚9點幾獲釋。

先後俾人捉咗嘅工人獲釋後，有部分人披露佢哋被關押嗰時，遭受唔同程度嘅酷刑虐待，包括俾人反剪錔住、暴打、掌摑。烏有之鄉站長范景剛、毛澤東旗幟網站長時邁等左翼人士亦有組織聲援團，聲稱有1100人，表態支持「佳士工人階級的正義鬥爭」，並前往深圳燕子嶺「與先進工人一起為正義事業奮鬥」。

29號，網上出現北京大學學生岳昕等人發表嘅《北大學生就「深圳7·27維權工人被捕事件」的聲援書》。30號，出現《清華部分學生、校友的聲援書：立即釋放被拘工友與群眾！》等聲援工潮嘅文章，要求深圳警方立即釋放被捕工人，並就抓捕行為解釋同道歉。聲援書唔夠三個鐘就俾人刪除，不過已經有過萬閱讀量。另外，由部分聲援者發佈嘅公開信就有兩千幾人聯署，聯署者主要來自中國各高等院校同部分公民。噉嘅形勢之下，佳士公司突然發布聲明，話唔存在阻撓成立工會嘅事實，又話網上消息係「惡意誹謗」。深圳坪山公安嘅官方微博亦話警方執法行動合理合法。呢條信息有啲中國媒體原文轉載，不過過幾日俾人刪除。

7月29號，超過20間著名高校嘅學生發表聲明支持佳士工人維權，北京大學、中國人民大學等十幾間高校嘅學生發出聲援書。另外仲有香港大學教授潘毅、香港中文大學教授邱林川等百幾位學者聯署，呼籲釋放被捕人士，支持工人自主籌建工會。潘毅認為，「工人已經覺悟到必須有自己的合法組織，這一點肯定比以前的運動更有進步意義」。中國勞工觀察創始人李強認為，「他們出來組建工會，表達了工人要當家做主的政治訴求」。

8月1號，國際特赦組織發表聲明，中國研究員潘嘉偉表示當局應「解決剝削勞工權益的問題，並應尊重工人結社自由的權利」、「除非有證據證明所有參與抗議的人犯了國際公認的罪行，否則這些人應立刻無條件獲釋」。同一日朝頭早喺香港，職工盟、社民連同街工勞工組等多個團體總共大約30人從西區警署遊行到中聯辦，聲援佳士工潮。職工盟表示將向國際社會申訴以施壓，繼續支持大陸工人去抗爭同成立獨立工會。因為中聯辦拒收抗議信，示威者將信件同標語黐落中聯辦門牌。

8月1號，佳士公司喺官方網站同微信公眾號發布文章《佳士科技，用心壘起溫暖的員工之家》，內容宣傳公司嘅員工福利。8月2號，廣東省總工會、深圳市總工會、坪山區總工會、龍田街道工會四級中共官方工會進駐佳士公司，組織建立工會。當晚佳士組成工會籌備小組，組長係坪山區工會副主席。

8月5號，陝西毛學組負責人趙東民向中華全國總工會（全總）主席王東明遞信警告，要求全總介入，指出工人若被迫暴力維權，工會官員將首先被清算。5號晚，聲援團喺街頭散發傳單，向市民介紹佳士工人嘅情況。駐紮惠州嘅聲援團表示，今日派來佢哋樓下監視嘅人員明顯多咗。房東話，俾當局威脅，要求惠州聲援團離開，聲援團表示拒絕。至少6個北大學生新加入聲援團。

8月6號，經過幾日休整集結，聲援團再次前往燕子嶺派出所，要求無條件釋放俾人捉咗嘅工人同聲援者。同日，一個有47年黨齡嘅老幹部張勤德前往聲援，佢話自己「一定要與工人階級站在一起，與佳士工人共進退，把這場鬥爭進行到底」。6號朝早嘅集會，總共有四十幾個共產黨員同退休幹部參加，佢哋冚嘭冷來自「烏有之鄉」。聲援團約50人中午喺燕子嶺派出所拉起橫額，展示「工人無罪！組建工會無罪！」等標語，高叫「嚴懲打人黑社會」、「工人無罪」，要求無條件釋放工人同聲援者。Twitter帳號「勞工研究」話，深圳維權律師範標文等人近日得以會見兩名被捉工人，而兩位律師聞宇、黃沙，朝早遞交會見手續，要求48小時安排，點知下晝就俾廣州市司法局律師管理處談話，要求退出。

8月9號，聲援團發表一位叫做「阿英」嘅女工事蹟。佢正處於哺乳期，但俾差人捉咗，拘留期間亦唔俾會見律師。

沈夢雨失蹤

岳昕嘅Twitter話，8月11號晚7點幾，工運積極參與者沈夢雨俾來歷不明嘅人捉走，啲人自稱係沈嘅「叔叔伯伯」，沈下落不明。美國之音記者聯繫嶽昕，岳就話帶走沈嘅唔係佢啲「叔叔伯伯」，而係3個身份不明嘅人，而聲援團成員「小胡」據報亦俾人帶走。惠州市大亞灣經濟技術開發區公安局嘅微博「@平安大亞灣」話，「飯後沈夢雨被其父母接上車帶離」，「此事為其家庭內部矛盾糾紛，不存在綁架」。岳接受BBC記者採訪，否定呢個講法，指出「如果真是被其父母和平接走，為何去追車的同學會突然被堵住？」佢喺Twitter度話，聲援團要求調閱監控影片，「主幹道上四個攝像頭突然全部壞掉」。沈夢雨俾人捉走之後，聲援團成員好快就向當地公安部門報警，但係佢哋話，報警期間俾公安當犯人噉審問，而且公安對案件只做行政筆錄，冇做刑事筆錄。13號朝早，美國之音記者聯繫岳昕，岳話沈夢雨仲係失蹤。自由亞洲電台記者13號致電燕子嶺派出所詢問沈夢雨係咪喺派出所，對方話唔清楚。

8月12號，北京工人之家創立者、社會活動人士、民謠歌手孫恒創作並發布歌曲《警察叔叔，夢雨去哪了？》，向綁架沈夢雨嘅行為表達強烈譴責。

自由亞洲電台引述知情人士消息，截至8月13號，30人當中已有16人獲釋，但佢哋獲釋後仲係俾人監控。獨立媒體人北楓表示，仲俾人捉住嘅14位工人之中，有7位佳士工人，7位外地工人。一位被拘工人透過網絡話畀RFA記者知，喺看守所一個三十幾平方米嘅監房困咗五十幾人，沖涼要沖凍水，食飯或者俾公安提審嘅時候，見到管教都要抱頭或者踎低，一啲尊嚴都冇。同日晏晝，來自北京大學、南京大學、北京語言大學、北京科技大學、南京中醫藥大學嘅左翼學生同佳士工人聲援團會合，嶽昕表示「現在我們至少有三四十個人」。佢哋喺燕子嶺派出所附近嘅龍江城廣場集會拉橫額，叫口號「還我夢雨，還我聲援團同志，還我工友」，聲討「社會黑勢力」，但係因為驚有更加多團員俾人捉而唔敢再去派出所門口抗議。8月14號，聲援團發表《聯合聲明》，反對部分學校「威脅」聲援團成員嘅行為。

8月17號，網上出現由古正華、張勤德、王子愷等51人聯署《這是一起嚴重的政治事件——致中共中央、廣東省委和深圳市委的公開信》。8月17號，BBC中文網刊登香港大學教授潘毅嘅文章，提出佳士工潮「開啟了中國工運的全新篇章」。

聲援團持續受壓

8月18號，新浪微博流傳多條消息，話中國各地高校已開始統計去過或身在廣東嘅學生，相信同呢次事件有關。微博相關話題冇辦法搵到任何相關內容，微信群只要提到相關信息就會封群封號。同日朝早，聲援團成員付佳慧佢阿爸喺聲援團住處揼門、騷擾。晏晝，聲援團成員張小玉嘅父母出現喺聲援團文藝宣傳場地，同聲援團發生激烈爭執並掌摑張小玉。

8月19號，岳昕喺網上發表公開信，上款係「尊敬的黨中央和習近平總書記」。公開信介紹佳士工潮，提出聲援團嘅訴求，包括釋放被捕工人學生、依法組建工會、徹查聲援團成員失蹤等。當日，香港社民連等團體一行約20人，由西區警署出發遊行至中聯辦，高叫「釋放沈夢雨」、「組建工會無罪」、「釋放佳士工人」等口號。佢哋認為惠州警方所講「四個監控全部損壞」係有意拖延調查，並指十幾個工人俾人拘留，有工人同聲援者俾警方毆打。

8月20號，張小玉、付佳慧發布關於家庭問題嘅影片聲明。影片內容提到家長衝擊聲援團嘅活動係有組織、有預謀，認為衝擊活動背後有黑惡勢力操縱。當日，美國之音記者聯繫岳昕，岳表示有人受國保指使，冒充學生家長跟蹤，幹擾聲援人士。北楓表示，相關人員通訊工具受到幹擾，大學生聲援團岳昕嘅手機已無法使用。8月21號，自由亞洲電台記者致電岳昕，岳表示仲喺度核實赴粵學生遭到調查嘅事件，另外佢個微信號亦俾人封禁。

8月22號，聲援團喺網上發布沈夢雨輾轉發出嘅聲明，聲明描述咗佢喺8月11號晚被綁架嘅經過，以及之後俾人軟禁喺深圳銀湖會議中心5號别墅，俾人嚴密監視、嚴重限制人身自由。聲明提及，看守嘅人喺交談中提到「大隊」之類嘅詞。當日朝早，聲援團北京分團前往全國總工會信訪辦提交信訪材料，全總老幹部李程之全程參與並題詞「工人頂天立地，人民當家作主」。

有香港記者被禁止入境。警察試圖搶奪日本記者嘅採訪設備。

清場

8月24號凌晨5點左右，位於惠州惠陽區嘅「廣東深圳建會工人聲援團」俾警方暴力清場。現場學生發出兩段短影片之後，聲援團成員全體失去聯絡。